Bakı ərazisində simsiz WiFi standartlı Internet xidmətləri göstəriləcəkdir. WiFi texnologiyası üzərində qurulmuş İnternetə simsiz qoşulma servisi HOTNET ticarət nişanı ilə təqdim edilir. 

Paytaxtın müxtəlif yerlərində quraşdırılmış hot-spot şəbəkəsi bütün şəhər ərazisində WiFi standartlı simsiz Internet-ə qoşulmaq üçün şərait yaradacaqdır ki, bu da təkcə Azərbaycanda deyil, bütün regionda ilk dəfə tətbiq edilir.

Hal-hazırda WiFi simsiz xidmətlər sahəsində ən geniş yayılmış standartlardandır. Bu gün faktiki olaraq bütün mobil qurğular – noutbuk, fərdi cib kompüteri, smartfon və mobil telefonların bəzi modelləri bu standartı dəstəkləyir. Təqdim olunan WiFi xidmətləri qeyd olunan avadanlıqların bütün istifadəçiləri üçün simsiz Internet-ə qoşulma imkanı yaradacaqdır.

Layihənin birinci mərhələsinin həyata keçirilməsi çərçivəsində paytaxtın mərkəzi küçələrində və ictimai yerlərdə radiosiqnalın keyfiyyəti sınaqdan keçirilir.